طريقة شهية لعمل الميني بيتزا

الوصفة تقدمها صديقة الهوانم دوت كوم / ياسمين عبدالحميد. تقول ياسمين: " ‎أنا أبنى بيحب البيتزا جداً و بيحب يأخذها معه فى المدرسة فبعملها له فى البيت و بقطعها بأشكال كثيرة، جربوها و أولادكم هيحبوها جداً"

المقادير:

    ‎عجينة بيتزا (أنا بجيبها من الفرن وبقول للراجل عايزه عجينة العيش الفينو).
    ‎صلصة البيتزا (ممكن تجبيها جاهزة من السوبر ماركت و هى بتتباع فى برطمنات و بتكون جنب الصلصة و ممكن تعمليها فى البيت).
    جبنة موتزاريلا
    جبنة شيدر
    جبنة رومى
    جبنة فلمنك
    زيتون أسود مقطع شرائح.
    فلفل أحمر وأصفر وأخضر.


الطريقة:

    افردي العجينة وقطعيها بقطاعة مدورة أو بقطاعات الكويكيز على شكل حيوانات مثلاً
    أدهني صينية البيتزا التيفال (أو أى صينية أخرى) بالسمن ورصي العجينة المتقطعة أشكال فيها.
    بملعقة صغيرة ضعي قليل من صلصة البيتزا على كل قطعة عجينة وافرديها.
    ضعي الجبنة المبشورة فوق الصلصة.
    البيتزا المتقطعة على شكل دائرة ممكن أن تجعليها على شكل وش طفل صغير (نعمل له عينين بشرائح الزيتون وشعر بالفلفل الأصفر وأنف بالفلفل الأخضر وفم بالفلفل الأحمر)
    ممكن نعمل طفل فرحان، نعمل شفايفه تضحك على فوق وممكن يكون زعلان تكون شفايفه لتحت وممكن يكون مذهول فنعمل شفايفه مدورة وهكذا نبتكر و نشرك أولادنا معنا وهم سيحبون ذلك وسيحبوا  أن يأكلوا من الأكل الذي شاركوا في عمله.
    أما البتيزا المقطعة على شكل حيوانات، يمكن أن نعمل لها عينين وأنف وفم وشعر أيضا.
    ندخل الصينية الفرن وبعد النضج نخرجها ونضعها لأولادنا فى اللنش بوكس.
    ممكن نقدم معاها أصابع خيار وجزر أو نعمل لهم معاها سلطة زبادى للتغميس
    ‎وبألف هنا وشفا :)