جوزي ده كان عبارة عن لسان طويل طالعله راجل وآسفة لكل الرجالة اللي هوة منتمي لجنسهم , المهم اول ما اتجوزته بكام شهر ابتدت دناءة الإنسان تظهر وعشان انا كمان كنت بشتغل ومرتبي اعلى منه فهو قرر ان فلوسه يشيلها للتحويش في بنك في مصر وانا اللي اتولى البيت بالكامل , وافقت طبعا مش بمزاجي لكن عشان مليش اخ ده اولا وكل اخواتي بنات وابوية وجوده للأسف زي عدمه وده ليه قصة تانية خالص مأساوية بس مش موضوعنا دلوقتي , الخلاصة انا مليش اللي يدافع عن اي حق لية او لأولادي ولنفس السبب رضيت باللي هحكيه .
جوزي بدأ يبقى ليه طلبات كتير مادية طبعا ولما الموضوع زاد عن الحد ابتديت ارفض وده ادى الى تطور الموقف الى انه يبدأ يضربني ويشتمني ويهيني لكن المصيبة ده كله كان بيحصل قدام الأولاد وكانوا ساعتها سنهم صغير جدا أطفال .. كلمته كتير في ان يخلي مشاكلنا بننا ولا كان بيفرق معاه لدرجة ان في يوم الأولاد تعبوا ولاحظت عليهم اعراض ساعتها ما كنتش فاهماها فرحت بيهم للدكتور قال لي اولادك أصابوا بمرض السكر وده واضح انه ناتج عن ضغط عصبي عالي .. طبعا مش هقوللكم حسرة القلب اللي جاتلي عل اولادي ربنا ما يوري حد , المهم الأولاد ابتدوا ينتظموا على الدوا لكن همة لسة مرضى , انا بقى موضوعي ساء اكتر وضرب جوزي لية ابتدا ياخد شكل مختلف الضرب بقى مبرح لدرجة انه مرة ادالي بالبكس في عيني عمل لي انفصال في الشبكية وحاجة زي نزيف داخلي قعدت اتعالج فيها كتير ومارضتش انزل بلدي لسببين .. أولا امي كان هيجيلها حسرة علية تانيا وابويا انا متأكدة انه مش هيعمل حاجة تانيا ان جوزي اصلا ماوافقش انزل , عدت الأيام السودا وكلها اسود الحقيقة .. مفيش يوم واحد يوحد الله فات علينا إلا وفيه السيناريو اللي بحكيه ده .. كذا مرة الجيران سمعو صراخي لدرجة ان مرة راجل جارنا هوة ومراته كسرو علينا الباب قاله ده مجنون وهيقتلها طبعا اخدو نصيبهم من الإهانة لكن كتر خيرهم مسألوش فيه وابتدوا ينصحوني بالنزول بلدي بأي طريقة حتى لو هروب ومن وراه ووعدوني لما ارجع مصر همة هيخلو المحامي بتاعهم يتابعني ويرفع عليه قضية طلاق .. مكنش ساعتها نزل قانون الخلع , المهم جوزي شك في جارتي وجوزها بسبب ترددهم علية يوميا فقطع علاقتي بيهم بالإكراه والتهديد ليهم وبصراحة انا خفت عليهم منه وقلت حرام الناس ملهاش ذنب , دخلت بعد كدة على مرحلة تانية من العذاب وهية ان جوزي بدأ يمد ايده على الأولاد ودول أطفال ما يستحملوش وف مرة ضرب الولد علشان مرضيش يدخل ينام بدري للمدرسة فجره من ايده عمل له مزع ذراع انفصل عن الكتف وطبعا قعدت اصرخ فيه واشتمه انا كمان ونزلت انا وجارتي للمستشفة نشوف الولد جراله ايه واتجبس فيها , بنتي بقى دخلت في حالة إكتئاب وبعالجها عند دكتور بس لسة ماكنش ظهرت اي تحسن ساعتها , آسفة اني طولت عليكو بس ده بإختصار جدا , الزوج بقى اتطور اكتر وبدأ يجيبلي ستات البيت , عايزين الصراحة .. .. انا كان ولا فارق معايا لأني شفت معاه أسود ايام حياتي وحسرني على ولادي ومن كتر الحزن والكآبة الدورة الشهرية اتقطعت عندي وانا مكملتش ال ٣٠ من عمري , ده غير انه بقى يجيلي نوبات نفسية غريبة من كتر الضغوط , مش هكدب عليكو انا فكرت اقتله بس في ثانية ربنا ستر لقيت ولادي قدام عيني قلت خلاص انا هحاول اهدا لغاية ما اشوف حل نهائي وطبعا هوة رفض الف مرة الطلاق لأنه مستفيد من ورايا جدا وف نفس الوقت خدامه ببلاش لأولاده اللي همة اصلا مش فارقين معاه , اتطورت الدنيا الى انه ابتدا يتهمني بالجنون وبدأ يعمل افلام غريبة ومواقف عشان يثبت للجيران اني بخرف ومجنونة , في وسط كل الأحداث دي ربنا أراد وجاله مرض بس عادي قعد بيه في السرير حوالي اسبوعين وفجأة قاعدة جنبه لقيته ميل براسه على المخدة وجاله زي شرقة جامدة جدا مش قادر يطلع بيها نفسه فالموضوع لفت انتباهي بدأت اسأله مالك كذا مرة مش قادر يرد جريت اجبلة مية رجعت لقيته قابل وجه ربه الكريم , في اللحظة دي مبقتش قادرة ولا عارفة احس بإيه وابتديت أسأل نفسي .. هوة انا مخضوضة ولا فرحانة جدا ولا مش مصدقة ان ربنا جت من عنده ولا خايفة عشان لواحدي مع الأولاد ؟ اسئلة غريبة جدا وحالتي بقت أغرب .. المهم بلغت المستشفى وكان مات فعلا الحمد لله واول حاجة عملتها بلغت امي بالخبر وهية بلغت اهله وكانوا مصرين ينزل يندفن في مصر ولولا خاطر أمه الست الطيبة كنت سيبته زي الكلب في بلاد غريبة لكن أمه الوحيدة اللي من عيلته اللي كانت في صفي بس للأسف قليلة الحيلة وملهاش طول الوقت حكم عليه , ونزلنا كلنا فعلا وانا دلوقتي عايشة ومش عايشة مع أولاد كبروا لكن بكل الأمراض النفسية اللي محدش متخيلها وانا اللي العيا أكلني نفسيا وعضويا , صحيح مش عارفة هعيش إزاي بالنفسية دي بقيت عمري ده اذا لسة لية عمر لكن بصلي واحمد ربنا انه خلصني من زوج كان ممكن وسهل جدا الأمر بيننا ينتهي الى جريمة والعياذ بالله , انا كتبت مشكلتي لعلها تكون موعظة لبعض الناس اللي عايشين في غفلة ده العمر لحظة نفس داخل ويمكن مش خارج .. ادعولي ربنا يهون عليا واولادي الأيام وربنا يتولانا .
مدام ح . أ
