المهم اليوم اللي جت فيه مامته علشان تشوفني كانت جايبة أختها معاها، حسيت بحاجة غريبة في الموضوع وفي نفس الوقت ماستريحتش لمامته، وكنت باحس بضيق من ناحيتها، وبعد ما مشيوا كلمته وفهمت منه إن مامته عايزة تجوزوه بنت أختها اللي جت معاها، وبعدين في الاتفاقات صارحناه بكل حاجة بخصوص الماديات؛ لأن والدي متوفى والظروف يعني الحمد لله.
المهم وافقنا على كل حاجة؛ برغم إنه حمّلنا فوق طاقتنا، وبعد كده عملنا الخطوبة وكنت سعيدة جدا، وأسعد واحدة في الدنيا؛ ولأني حبيته قوى كنت باحكي له على كل حاجة، وبعد مرور 4 شهور على الخطوبة بدأ يتلكك على أي حاجة.
بعد ما مر شهرين على التلاكيك بتاعته وخناقاته، وأنا اللي باصالحه، وبدأت أحس إنه بيبعد عني.. لغاية يوم كنت معزومة في فرح واحدة صاحبتي، ورحت أنا وماما وأخواتي وهو مارضيش ييجي معانا، ورحت الفرح وكان تاني يوم فرح جارتي وهو كان معزوم معانا، جه قبل الفرح البيت وقال: "إنتم رجعتوا متأخر ماكانش لازم خطيبتي تروح الأفضل إنها تقعد في البيت وتروحوا أنتم"، ماما قالت له: "ماينفعش واحدة تقعد في البيت لوحدها"، قال لها: "طيب كل شيء نصيب".. ومشي وفسخ الخطوبة
أنا انهرت جامد بالعياط ونفسيتي تعبت ولحد الآن، وأنا نفسيتي تعبانة حتى بعد مرور 6 شهور، ومن بعدها بقيت أخاف ارتبط بحد تاني، وبقيت أكره الحب اللي يخليني أنهار بالشكل ده، وثقتي في الناس قد تكون انعدمت.. قولوا لي الناس نفوسها اتغيرت ليه؟!!
