أنا مجنونة؛ دي حقيقة، أنا مش طبيعية، تصرفاتي غريبة مع إن أهلي بيقولوا إني عاقلة جدا وهادية جدا، بس المشكلة مش في كده.
المشكلة إن جناني ده جوايا؛ بازعل وأفرح من غير سبب، ومودي بيتغير بطريقة عجيبة، أنا مش قادرة أفهمها، كمان بادّي المواضيع أكبر من حجمها؛ يمكن يكون كل ده لأني من جوايا مش واثقة في نفسي خالص، ودي حاجة أنا عارفاها ومتأكدة منها، مع إني باحاول دايما أتصرّف عكس كده، وده اللي بيبيّن للناس أكتر إني مش واثقة في نفسي.
أنا مرتبطة بإنسان وهو جه كلّم والدتي، والمفروض يتقدم لي في خلال شهرين، ويكلم والدي بس المشكلة إني خايفة أزهّقه من كتر عدم ثقتي فيه وفي كل تصرفاته، مع إنه إنسان كويس وطيب ومارضيش يكون بيننا أي شيء من غير ما يكلّم ماما ويستأذنها.
بس يمكن عدم ثقتي في نفسي هو سبب المشكلة، وهو بيقول إني مجنونة وبيتعب من المشاكل اللي باعملها بسبب خوفي منه وعدم ثقتي فيه؛ لأنه أصلا مابيحبش المشاكل.
أنا بجد مش عارفة أصلح من نفسي إزاي وأزوّد ثقتي في نفسي إزاي.. أنا آسفة إني طوّلت عليكم بس يا ريت تردوا عليّ بسرعة؛ لأني خايفة أضيّعه مني بسبب الهبل ده، وأبقى خسرت إنسان بيحبني
