بس ضافني بعيد ميلادي على صفحته على شبكة التواصل الاجتماعي، وحكى لي انه بيعرفني وبشوفني دايما، وضافني عمدا يوم عيدي، قعدنا نحكي مدة حديث عادي، حكى لي مرات انه معجب في، وكان بالمدرسة كل ما يشوفني يصير يتبسم وييجي لصفي كل يوم لحتى يشوفني.
صارت بينا مشكلة مرة، قمت محيته من صفحتي، وسمعته حكي، واغلطت بحقه، وقعدنا يمكن شهرين ما نحكي بالمرة، بس اشوفه بالمدرسة وخلص، بهاي الفترة حسيت عن جد اني بحبه، واني بشتاق لاحكي معه، وكنت اضل افكر فيه، ومرات ابكي واتندم ليش هيك حكيت معه.
بس بعدها رجع يحكي معي واتاسف لي، واليوم رجعنا نحكي بس مش مثل قبل، يعني قليل، وبنحكي حكي عادي، وهو ما بيسال، وانا لانه ما بعبرني ما بسال كمان، وبعمل حالي متجاهلته، وبحكي معه باستعلاء، ما بعرف ليش هيك بعمل معه!! عن جد مشتاقة له، بس ما بقدر احكي له .. انا بدي اعرف هو بحبني ولا لا!! مع انه حكى لي اكثر من مرة، بس كيف اتاكد؟ وليش هيك بعمل معي ؟
كل ما بشوفه قلبي بصير يدق، وعطول بفكر فيه، مع انه كثير حاولوا يتقربوا مني، وهو مش احسن منهم ولا احلى، وخايفة انه ما ارجع اشوفه بالمرة؛ لانه قريبا راح يترك المدرسة؛ لانه راح يتخرج.
احكولي شو اعمل؟ ولو سمحتوا بدون تجريح، ولا تحكوا لي صغيرة، واهتمي بدروسك. انا الحمدلله بعطي دراستي وقتها، ومهتمه بدراستي .. وشكرا لكم.
