وصلت مجلة الحياة رسالة من فتاة تطلب المساعدة. نعرضها عليكم قرائنا الاعزاء كما وصلتنا تماما دون زيادة او نقصان.. السلام عليكم جميعا.. اود ان اتوجه بالشكر لمجلة الحياة ولكل العاملين فيه وكل شخص سيتوجه لي بالنصيحة. اسمحولي احكي باللغة العامية لانو بيكون اسهل بالنسبة الي اني وصل مشكلتي الكون وبتمنى تفهموني.انا بنت سورية عمري 18 سنة عندي مشكلة صغيرة ويمكن البعض يعتبرها تافهة بس انا عنجد عم أعاني منها وهالمشكلة عم تزعجني كثير وبتمنى انكون تساعدوني.. المشكلة هي اني انا طالبة بكلوريا ولازم ادرس بجد حتى اقدر سجل فرع منيح بالجامعة لانو العلامات عنا طايرة يعني كتير مرتفعة واهلي حاطين كل امالهن فيني وحابين اني احمل شهادة عالية لحتى يرفعوا راسون فيني هني ابدا ما عم يضغطوا عليي وما عم يقلولي لازم تعملي هيك او هيك بس انو ادرس قد ما فيني لحتى اذا قدرت انو جيب علامات منيحة وانا هاد الحلم كتير معذبني خايفة ما اقدر اطلع متل ما بدون او متل ما بيتمنوا.
انا كمان عندي طموحات وطموحاتي كتير كبيرة بس خايفة اني ما اقدر حقق شي انا كتير عم بدعي لربي حتى يساعدني بس بضلني خايفة انو ما اقدر. كتير حابة اجتهد وادرس لاني دائما كنت متفوقة بدراستي ودائما كنت من الاوائل بس هلا انا مرعوبة بما انو مستقبلي كله على هالسنة كتير بخاف من الامتحانات خايفة ما اقدر خلص المنهاج.. خايفة ما اعرف جاوب عالاسئلة خايفة من مليون شغلة وشغلة، بعرف كل هاي اوهام عم اشغل حالي فيهون عالفاضي بس مو بايدي.. عم حاول ظبط برنامج لحالي حتى ادرس عليه بس ما عم يمشي الحال وما عم بعرف ليش.. اخ يا ربي والله رح جن..
برجع بقلكون يمكن تشوفوها مشكلة تافهة ويمكن هالشي عم يصير مع الكل بس المشكلة مشكلة صغيرة كانت او كبيرة.. بشكركون مرة تانية وبتمنى انو تساعدوني وتنصحوني كيف فيني ادرس وانسى الخوف وانسى كل الهموم والمشاكل اللي حواليي...اسفة عالاطالة.
