بس المشكلة إني قرأت على موبايله رسالة فيها كلام حب، وأنا أعرف إنه مالهوش في كلام البنات، وقال لي إنه عرفها قبل ما يعرفني، وده فعلا اللي اتأكدت منه، وقال إنها واحدة كلّمها فترة قليلة وسابوا بعض؛ لأنه عرف إنها كانت مرتبطة بواحد قريبهم، وقال لي إنه ماكانش عايز يقول لي علشان مش يضايقني.
المهم عرفت إن أخوه هيخطب، واللي هيخطبها دي واحدة أعرفها، بس أخوه كان عامل مشاكل مع أهله في البيت علشان يخطبها.. لقيت البنت دي بتتصل بيّ وبتعزمني على خطوبتها هي وأخوه، وكانت مصرّة إني أحضر، وفعلا رُحت، وكانت أول مرة أتعرف على أهل خطيبي بعد الخطوبة، لقيت حبيبي بيقول لي: "أنا عايز أعترف لك بحاجة.. إن البنت اللي كنت باكلمها واللي حكيت لك عنها هي البنت دي"، وإن أهله كانوا رافضين الموضوع علشان عارفين حكايتها مع حبيبي.
لكن أخوه عمل مشاكل كثير لحد ما خطبها، وإن أخوه كان مرتبط بواحدة قريبتهم، وهي عرّفته عليها وخانت البنت دي، مع إنها هي اللي معرّفاها عليهم.. طبعا أنا زعلت لكن احترمت صراحته.. وأنا وحبيبي اتخطبنا بعدها.
بس المشكلة إن البنت دي بتحاول تقرّب مني، ومرة قالت لي: "إنتي ماتعرفيش إني أنا وخطيبك كنا مرتبطين ببعض"، وكانت بتشتم في أهل خطيبي.
المشكلة إنها دلوقتي متقرّبة جدا من أهل خطيبي، ووالدة خطيبي بتحبها جدا، البنت دي في بيتهم منفتحين؛ كل شوية زيارات وكلام من ده، بس دلوقتي بتحاول تحتك بيّ، أنا باحاول أبعد على قدّ ما أقدر بس مش عايزاهم يزعلوا، أو أقرّب فيحصل مشاكل، وكل شوية يتدخلوا في حياتنا.
مرة أخو خطيبي يقول له: "اتصل عيّد على خطيبتي"، مع إن أخوه مااتصلش عيّد عليّ أساسا، ومرة تانية يعزموا خطيبي عندهم، ومرة مامتها تجيب له شغل.. أنا اتخنقت من كده، وحاسة إن حياتي هتتدمر بسببها.. أعمل إيه؟؟؟؟
