لسه ماتجوزناش وبيقولى يا الورث يا بلاش.؟..أرجوكم ساعدونى

السلام عليكم.. أنا فتاة مخطوبة بقالي سنتين من شخص كنت أعرفه قبلها، وأنا مترددة أكمل معاه؛ أهله صعبين مش بيفهموا في الذوق وخايفة يبقى زيهم، هو طيب وكريم وبيحبني قوي، بس عصبي، ومش بيفهم في الذوق زيهم في حاجات كثير باكتشفها فيه متأخر بتدايقني.

أنا ليّ خالة ربنا مارزقهاش بأولاد -ربنا يديها طولت العمر إن شاء الله- فهي قالت لي من زمان أوي إن أخويا وبنت خالتي هما اللي يورثوها.. فلما خطيبي عرف، قعد يقول لي: "إزاي هي تاكل عليكي حقك، وإشمعنى إنتي".. مع العلم إن إحنا 10 بنات وأخويا الولد الوحيد؛ فهي بتحب أخويا وبنت خالتي دي أكتر.

أنا راضية وعمري ما فكرت ليه خالتي مش هتخليني زيهم.. لقيته هو اللي بيقول وبيتكلم وبيتخانق، أضايقت وخفت، قلت هو ماله دي حاجة مش تخصه، أنا مش فارقة معايا أصلا دي حاجة عمري ما فكرت فيها، ويقول لي: "المفروض تزعلي منها، أو تقولي لها إشمعنى أخويا وبنت خالتي".

أنا مضايقة أوي إنه بيفكر كده على طول، بيقول لي: "هاتجوز عليكي لما أتجوزك، لو تعبتي ولو تخنتي".. طريقته بتخليني أخاف، أنا خايفة منه أوي ده جواز وعمر، خايفة أندم، وخايفة أسيبه أندم؛ علشان أنا بحبه، واتحدينا الدنيا كلها علشان نتخطب، خايفة يبقى زي باباه ومماته صعبين، وهو بيخاف منهم وبسمع كلامهم.. يا ريت رد بسرعة.