أنا شاب في منتصف العشرينات والحمد لله اتخرجت في إحدى الكليات المرموقة وعملت في مجال دراستي، وطول الفترة السابقة من وقت الدراسة بالإعدادية مروراً بالثانوية ثم الجامعة وأنا لم أقم أي علاقة مع أي فتاة من أي نوع، حتى العلاقات التي يقيمها الشباب دون غضب الله وكلا الطرفين يحترم الآخر وخلافه، لم أنجح في أن أقيمها مع أي واحدة، باستثناء طبعاً الزملاء اللاتي كنت أتعرف عليهن بحكم الكلية أو العمل أو غير ذلك.
لكن لم يحصل أي ارتباط من أي نوع، على الرغم من إني كنت أحياناً باشوف نظرة إعجاب من أي واحدة، ولأن مجتمعنا شرقي شوية وده بيتطلب حركة من الرجل أو على الأقل هو اللي يبدأ، لكن أنا ماكنتش باحاول أبدأ أو أتحرّك يعني يمكن ساعات كنت بافكر إن ده مش وقته، ساعات ماكنتش أحبّ أضع نفسي في موقف محرج مع أي واحدة.. السؤال هل ده غلط ولا صح؟ هل يمكن أن أول علاقة أعملها تكون مع الإنسانة اللي هارتبط بيها بس ده مش هيأثر عليّ؟ هل لازم الشاب يكون عنده خبرة عشان يعرف يحبّ ويخلّى مراته تحبه؟
وخصوصاً إن المسئولية تكون عند الزوج أكثر في العلاقة الزوجية من الزوجة؛ لأنه لازم يعرف إزاي يعاملها وإزاي يخليها مرتبطة بيه، وهذا أساس نجاح العلاقة الزوجية.. ساعات باشعر إني مش هاعرف أقول كلام في الحب زي الشباب ما بيعملوا بمعنى إني لما أحب واحدة ممكن ماعرفش أعبّر لها عن حبي.
وهل الموضوع ده هيؤثر عليّ في اختيار شريكة حياتي؟ بمعنى إني قد أكون ماعنديش خبرة في اختيار الزوجة، وهل مناسبة ولا لأ وهل هي محترمة ومتدينة وممكن تحافظ عليّ وعلى بيتي وعلى شرفي ولا لأ؟؟ حاجات كتير محيراني من الموضوع ده، لذلك أرجو منكم الإفادة جزاكم الله كل خير وشكراً.
