ياريت تساعدونى فى مشكلتى الله يكرمكم

انا هدخل على طول فى المشكلة انا عرفت واحد من النت حبيته قووى وهو كمان قال انة بيحبنى وهيتقدملى وكلمنا بعض واتقابلنا عاملته بما يرضى الله قالى انا كنت خاطب وحدة وقعدت 6 سنين وحاولت انى اخليها تعمل كل حاجة كويسة لكن مكنتش بتسمع كلامى وسبنا بعض فى الأول حسيت انة مش قادر ينساها لكن قالى انة خلاص نسى

المهم قالى هنعرف طبع بعض وبعد كدة هاجى اتقدم كنت فرحانة قوى بحبى له وحبه ليا والمصيبة قالى انة بيشرب حشيش على خفيف كنت خايفة اكمل معاه لكن مقدرتش ابعد عنه قالى هبطلها عشانك قلت مش مشكلة هساعده واقف جمبه وهقف جمبه عشان محتاجلى

كان كل شوية يسبنى وميردش على تليفوناتى باليومين وابعت فى مسجات ميعبرنيش ويرجع يكلمنى ويعتذرلى ونرجع زى ماكنا

اطور الكلام بينا كنا بنكلم بليل بقى كلامه يدخل فى سكك مش هى كلام بقى انتو فاهمين واحاول اصده ويقلى معلش اصلى بخرف لانى بكون عاوز انام

وفضلنا كدة وهو يماطلنى فى موضوع الجواز لكن مفيش فايدة وانا التمسله الاعذار

صارحته بمرضى المزمن قالى مش هسيبك وعمرى ما هتخلى عنك

كنت فاكرة انى كل حاجة فى حياته زى ماهو كل حاجة فى حياتى لكن للأسف فوقت فى الآخر مع انى كنت عارفة ان ربنا مش هيسبنى اغلط كدة الا لما يفوقنى

وفى النهاية قالى معلش انا مش هقدر اجوزك عشان كدة بعدت انا مرضتش اعلقك بيا ( تخيلوا جاى يقلى مرضتش اعلقك بيا شوفتوا قد ايه بيضحى !!!!)

انا مقدرتش انسى خطيبتى القديمة عقدتنى فى البنات وفى الجواز ( وانا والله عاملت هبكل حب وطيبة ولا عشان انا طيبة وغلبانة يبقى دة جزاءى ؟؟؟؟)

قالى انا هسافر وربنا يكرمك

مش قادرة ساعدونى بجد انا بموت من البعد والفراق والحزن انا سنى بيكبر وكل صحابى اجوزوا كان نفسى احب واتحب زى البنات الى بشوفهم

اعمل ايه ساعدونى بجد انا بموت ياريت الى تدخل تدعيلى بالله عليكم