وانعقد القران.. بس صدقيني أنا ماكنتش عايزاه، وبكيت كتير أوي بعد عقد القران، وفي ليلة الدخلة المفروض العروسة تكون أسعد واحدة بعريسها وهو كذلك؛ كنا متفقين على عربية تزفنا قلت له عربية عمي قال لي ماشي، واتفقنا وأنا نازلة من الكوافير لقيته جاب غير العربية اللي متفقين عليها، فباقول له مش إحنا متفقين على كذا تخيلي قال لي إيه؟ قال لي عاجبك عاجبك مش عاجبك ماتركبيش وامشي مانكرش إني رديت عليه بعدها علشان كان سايبني وماشي قلت له امشي ماتهمنيش اللي يبيعني أبيعه والأهل تدخلوا وصالحونا علشان الفضيحة والناس وكده.
ولما روّحنا ماكانش راضي يقرب مني فاتحايلت عليه وبكيت علشان فيه ناس جايين وإحنا في بلد أرياف وبعدين قعد يقول لي أنا ماكنتش عايزك أنا بحب واحدة وعمري ماهنساها قلت له لأ أنت اتجوزت خلاص، وبعدين أنا مريت بتجربة زيك بس ماقلتش هو الحب الأول مانساهوش قلت أنا اتجوزت ولازم أنسى إن ماكانش بمزاجي يبقى غصب عني حفاظا على كرامة اللي اتجوزته؛ قالي لأ هي الحب الأول ومستحيل أنساها، فزعلت وأكيد اتأثرت لأني ماعشتش حياتي لا جواز ولا خطوبة وبعدين أستنى إنه يروح الشغل مايروحش وبعدين شدّ معايا بسبب حاجة تافهة والله وقام طردني فبابا سأل على شغله وهو أمين شرطة فلقاه غايب 6 شهور وماحدش بيحبه في شغله وتاريخه أسود والمهم إنه مش معترف بكده، وبعدين بابا جاب له واسطة علشان مايترفدش من شغله والله ما اعترف بالجميل وأهله مش بيعبّروني لما يقابلوني مع إن الناس بتقول عليهم إنهم كويسين.
مش عارفة أعمل إيه؟ أنا مش بحبه ولا باطيقه اتعذّبت منه كتير خلال الأسبوعين اللي قعدتهم معاه وضرب وغيره، علما بأني ماتعودش على كده خالص، خايفة أرجع له يعاملني أسوأ وأجيب أولاد والآخر يبقى مصيري الطلاق، فاتطلق دلوقتي ولا أعمل إيه؟ بس ماتقوليش جرّبي لأنه مش بيحبني 1% علشان أحاول معاه.
قلبي دق لحبي الأول ومحتاجة له أوي وعرف بحكايتي وقال لي أنا هاكون معاكي مش هاتخلى عنك مهما حصل، وأنا بشر مش ملاك أكيد محتاجة للحب مش عارفة أعمل إيه؟
